عزيزى الشاب إذا كنت متزوجاً حديثاً وشعرت بأنك استعجلت فى زواجك أو انضحك عليك من أهل عروستك وعاوز تسيبها أو تخلع منها من غير ما تدبس فى مصاريف جديدة ليس أمامك سوى طريقة التزهيق والتطفيش التى يمكن لك ممارستها مع زوجتك حتى تسلم هى لك وتطالبك بحريتها دون التقيد بأى التزامات ماليه .
وهاهى 10 طرق سلمية وبسيطة وغير مكلفة يمكنك استخدامها لكى تعكنن على مراتك :
1- اصحى يوم جمعه بهمة ونشاط وجهز الافطار لزوجتك بس متنساش انك تستخدم 15 طبق
وأكبركمية من الملاعق والشوك و5 حلل من اللى عندكم فى المطبخ و10 كوبيات لاعداد طبق بيض وسندوتش جبنة ... بس متنساش تراعى ترك آثار السمنة أو الزيت على الارض مع ترك باب الثلاجة مفتوح وقشر البيض فى الحوض .
2 - اذا كنت بتتفرج على التليفزيون وهى عاوزه تغير القناة قولها معلش الحلقة دى مهمة أوى وأحد أصدقائى شافها على قناة فضائية وقالى ان الحلقة دى بالمسلسل كله ولو كنت بتتفرج على متش كورة هيبقى الموضوع أسهل كل ماحد من اللاعبين من أى فريق يمسك الكورة قولها معلش ثوانى انا حاسس ان الكوره دى جون حتى لو كان حارس المرمى ماسك الكورة والماتش واقف لان فى واحد مصاب .... ملاحظة "أغلب النساء ثقافتها الكرويه ضعيفة ".
3 - فى الصباح وأنت ذاهب لعملك وهى نائمة تعمد اسقاط أى شىء ثقيل أو خبط فى الباب بصوت عالى علشان تصحيها هى كمان ..اشمعنى انت تصحى يعنى وهى لأ ؟ ولو حاولت هى الرجوع للنوم مرة أخرى قل لها مادام صحيتى حضرى الفطار بقى .
4 - فى يوم عيد ميلادها زين لها تورتة عيد ميلادها بخمسين شمعة ولو سألتك ليه خمسين رغم أن عندها 15 سنة بس. اتحجج بضعف الانارة فى البيت وانت بتبص على النجفة اللى عندكم اللى فيها 30 لمبة مع ابتسامة صفراء بسيطة وخفيفة .
5 - لو مراتك عامله رجيم اجرى على السوبر ماركت ومحلات الحلويات واملى الثلاجة بالشيكولاته والجاتوهات والبيبسى وأكياس الشيبسى .. ويراعى منك التجول فى الشقة وانت مستمتع بأكل الجاتوه وتلك الملذات امامها .
6 - ماتنساش رايك فى طبيخها ..لو عامله لحمه قولها حلوه اوووووى الفراخ دى .. ولو عامله حله باميه قولها حلوه اوووى الملوخيه دى يا حياتى حاطه عليها ايه ؟ ولو عامله كيكه قولها انا بحب اشرب الشاى مع البسكويت الحلو ده .
7 - لو طلبت منك تنشر الهدوم قولها حاضر مع ابتسامه خفيفه وبعد ماتخلص نشر الهدوم ادخل عليها وقلها انا نازل اجيب الهدوم اللى وقعت منى فى الشارع..ولو سالتك هو ايه اللى وقع ؟ اذكر كل هدومها اللى كانت مغسوله مع فرده شراب من بتوعك علشان متبقاش مقصوده منك .
8 - لو الزوجه قررت مسح ارضيات البيت حاول انك تروح وتيجى على المناطق المبلوله متحجج بانك محتاج بانك تتصل ضرورى بواحد صاحبك مرة ومرة عشان تجيب الجرنال ومفيش مانع انك تقول انك حاسس ان التليفون هيرن كمان شويه .
9 - لو كانت هى مشغوله فى نظافة البيت أو مع الأولادوطلبت منك تغسل كوبايتين الشاى بتوع الصبح الموجودين فى الحوض ارجعلها كمان دقيقه من دخولك وانت ماسك كوبايه من الاتنين وهى مكسورة واسالها فى براءة "ارمى دى فين "؟
10 - وانت قاعد تتفرج على التليفزيون وهى طالع عينها فى تنضيف البيت وبعد ماتخلص وتيجى تقعد تستري جنبك..بصلها وقلها حبيبتى معلش ممكن كوبايه ميه علشان ظهرى بيوجعنى
اتبع تلك ال10 طرق وادعى لى وشوف بيتك هيبقى جنه ولا لأ .